Spring naar inhoud

Schrieven ien t Zeuvenhuusters

Gusteroavend hadden we een veurlichtingsoavend ien e Blibiotheek over t Westerkwartiers. Minsen uut t dörp zallen t wel beter kinnen as Zeuvenhuusters. Dus nuum ik het nou ok moar zo. Alie de vries uut Nuus gaf ons les en het was mooi heur n keer weer te treffen. Al eerder had ze n vroaggesprek met mij had en dat vond ik toen leuk om te doen.
Moar even weer terug noar gusterovend. Alie kon veul vertellen over t westerkwartiers. Nou is dat niet zo vremd veur me moar wat wel mooi is dat ze ok veul kon vertellen hoe t goed schreven worden moet.
Zo is de eerste regel die we te heuren kregen dat r niet warkt word met het ' teken. Dat is nog niet zo lang leden bepoald. Vroeger mosten we dus schrieven van Zuev'mhuuzen. Volgens de geleerden is dat nou Zeuvenhuuzen.
Ik heb gusteroavend n stel woorden opschreven woar ik niet van wist dat ik t zo schrieven mos. k Zal proberen om hier regelmoateg een stukje te schrieven ien t Zeuvenhuusters en ik hoop dat de rest van het westerkwartien me dat niet kwoalik nemt. Want ze binnen wel met mooie dingen bezig. Doar is van alles over te lezen op www.mienwesterkwartier.nl.
Wat natuurlek harstikke mooi was dat Geert Zijstra een poar liedjes zongen het en op zien gitaar speuld het.
Geert en Alie t was n mooie oavend. Ik heb slim genoten.

4 gedachten over “Schrieven ien t Zeuvenhuusters

  1. Geert Zijlstra

    Jan,
    Mooi das t e smoak te pakken kregen hest. Ik hoop dat wij onze webstee vlot ien e lucht hemmen, dan ken we dien verhoaltjes doar ok ploatsen. Zit moar niet ien over concurrentie, wat mij aan gijt ken der niet genog schreven worden ien t Westerketiers. Kop derveur en deurgoan.

  2. Gelkinghe

    't Liekt wel Dreins ja. En was dat now veur nijerwetsigheid daj gien kommagie in de lucht meer mag'ng bruken?
    Overigens warkt die link niet Jan, doar mut nog 'n erregien achter.

  3. Jan Hut

    Zeuvenhuusters is wel echt Grunnings moar wel met Friese en Drense invloed. Andere grunningers vienden t moar half stront half regenwotter wat we proaten. Zuilf wiek niet aanders. En van dat hoakje ien e lucht doar zeggen de Drenten misschien wel kommagien tegen. Wij uut het westerkwartier bennen niet van de ies. Drenten zeggen dubbelies en kwarties. Moar wij niet.

  4. Ale Renkema

    Dat is ja wat,heb'k het west'rkwartiers skreem net een beetje in de vingers, kink het weer ofleern.Woar kin'k de regels veur't skreem krieg'n, of ston'n ze nog niet op't papier.En as seumhuster, vin ik zeuvenhuuzen niet zo mooi as seumhuus'n, zeg nauw zulf.

Geef een reactie

Het e-mailadres wordt niet gepubliceerd. Vereiste velden zijn gemarkeerd met *